Okupazioa, tresna eta norabidea

Bi iniziatiba hauek, okupazioaren gaia plazara berriz ekartzeaz gain, ingurugiro anitz mugiarazi dute. Elkartasuna, elkargoa eta ilusioa berpiztu dituzte, bizi-biziki, molde zabalean eta askatasun giroan. Arbonan eta Hazparnen inplikatu direnek argiago dute gaur zein diren egindakoaren potentzialak eta mugak, bai eta aldarrikapenei begira zehazki non kokatzen diren indar harremanak. Bilanen tenorea da eta, bakoitzean lortu edo galdu denarekin, esperientzien metaketak ekintza mota horien hobe behatzeko lehengaiak ekartzen dizkigute.
Horrez gain, okupazio horiek ez dira desertu baten erdian gertatu. Espekulazioaren (eta jabetza pribatuaren) arazoei buru egiteko, han-hemenka dinamika herrikoi zenbait egituratzen ari dira. Norekin, zer baliabiderekin eta noraino joan? Segitzeko, ekin-moldeen eta perspektiben partekatzeko osagaiak baditugu. Zehazkiago, okupazioen sostengatzea eta bultzatzea ardatzetarik bat luken sare baten sortzea, osagaiak artikulatzeko, hasitakoa sendotu eta epe luzean kokatzeko.
Zertarako proiektu gehigarri hau? Ez al dira jada lurra eta etxebizitza ardatz dituzten talde aski? Ariketak zorabioa ekar dezake: elkar topatzea eta oinarri komunen finkatzea, neurrian eta errespetuan aritzea, desadostasunetan eta akiduretan ez galtzea... Ekimen baten arrakasta, hein handi batean, bere prestaketak baldintzatzen baitu. Beraz, finki eta patxadaz jokatu beharko, ameskerietan erori gabe, ez eta baliogabetzetan. Heldu diren urteetan, lurra eta etxebizitza gai zentralak izanen dira eta fase berri horretan, ekintza zuzena bultzatu nahi dugun guziek badugu zer egin, ahalmenak, aniztasuna eta kohesioa zainduz.
Zein izan daitezke proiektu honen ezaugarriak? Eztabaidari ekarpena egiteko, hona hiru proposamen. Hasteko, kolektibo herritarren arteko loturaren bidez, Ipar Euskal Herrian sare horizontal baten osatzea, inongo egituraren edo antolakunderen estrategiaren menpeko izan gabe, ildoak autonomoki erabakitzeko gaitasunarekin. Bestetik, erresistentzia multipleen, alternatiben eta elkarbizitza espazioen garatzeko palanka sortzea. Azkenik, kapitalismoa eta sistema dominantea errotik kritikatzen dituen hausnarketa gunea.
Herri eta egoera bakoitzak baditu bere berezitasunak eta asmoa ez da besteen ordeztea edo mamirik gabeko azala ibilaraztea. Aldiz, zertan garen eta nora buruz joan nahi dugun jakitea bai, gerora begira koordinatzen eta elkarlaguntzen ahal garen jakiteko. Ondoko asteek eta hilabeteek, segurenez, energiak eta gogoak zertan diren hobeki erakutsiko digute. Anartean, egin dezagun ahalegina, okupazioa aitzina jotzeko tresna eta norabidea baita!